پکتیکا کې د کرنیزو محصولاتو مدیریت د پروژو چارې د بشپړېدو په درشل کې دي
۲۴ تله ۱۳۹۹
په نږدې راتلونکې کې به په پکتیکا کې د کرنیزو محصولاتو مدیریت اړوند د ۲۴۳ پروژو چارې بشپړ او ګټې اخیستنې ته به وسپارل شي. دغه پروژې د برخمن شویو بزګرانو په لس سلنې ونډې سره د ۱۶۷ میلیونه افغانیو په لګښت د پکتیکا ولایت په مرکز او اوو ولسوالیو کې پلي کیږي.
په دغو پروژو کې د پیازو ۵۰ او د کچالو ۸۰ صفر انرژۍ زېرمتونونه، ۳۳ د مڼو صفر انرژې سړې خونې او ۵۰ ممیزخونې جوړول او د سبو او مېوو ۳۰ وچوونکي لمریز دستګاوې وېشل شامل دي.
د کرنې وزارت د کرنیزو محصولاتو مدیریت د پروژې له لارې سږکال د هېواد په ډېرو ولایتونو کې د پیازو او کچالو د خوندي کولو په پار د پیازو او کچالو صفر انرژۍ سړې خونې «زېرمتونونه»، ممیزخونې او د مڼو صفر انرژۍ سړې خونې جوړ کړي دي.
