لوګر کې د کرنیزو محصولاتو مدیریت پروژې ډېر ژر ګټې اخیستنې ته سپارل کیږي

۲۴ تله ۱۳۹۹
د کرنې وزارت د کرنیزو محصولاتو مدیریت د پروژې په اډانه کې د لوګر په ولایت کې د کروندګرو او بڼوالو د حاصلاتو د ساتنې او خوندیتوب په پار د ۴۰۶ پروژو د پلي کېدو چارې پیل کړي دي، چې رغنیزې چاري یې ۹۰ سلنه بشپړ شوي دي او پاتې چارې به یې هم ډېر ژر بشپړ او ګټې اخیستنې ته به وسپارل شي.
په دغو پروژو کې ۲۷ ممیزخونې، د پیازو ۱۳۸ او د کچالو ۱۱۲ صفرانرژۍ زېرمتونونه او د مڼو دوه صفر انرژۍ سړې خونې جوړول او پر کروندګرو د سبو او مېوو ۱۲۷ لمریز وچوونکي دستګاوې وېشل شامل دي، چې د بزګرانو په لس سلنې او د کرنې وزارت په ۹۰ سلنې ونډې سره پلي کیږي.
د دغو پروژو ټولیز لګښت نږدې ۱۹۷ میلونه افغانۍ ده، چې رغنیزې چارې یې تر یوې اوونۍ بشپړ اوګتې اخیستنې ته به وسپارل شي.
ددې برنامې له لارې ګڼو بې کارو خلکو ته د کار زمینه هم برابره شوي ده؛ دغه پروژې د لوګر ولایت په مرکز او ولسوالیو کې کرنیزو حاصلاتو ته په کتو کروندګرو او بڼوالو ته جوړیږي، چې په جوړېدو سره یې د حاصلاتو د خوسا کېدو مخه نیول کیږي او د بزګرانو او بڼوالو د عوایدو د زیاتوالي لامل هم کیږي.