کندهار کې د مرخېړیو د کرکېلي دودولو هڅې
۱۲ تله ۱۳۹۹
د کندهار د کرنې، اوبولګولو او مالدارۍ ریاست وایي، چې په دې ولایت کې د مرخېړیو د کرکېلي دودولو په پار هلې ځلې روانې دي.
په دې ولایت کې د لومړي ځل لپاره په توافقي ډول د مرخېړیو کرکېله ترسره شوې ده، چې پایله یې ډېر ښه او مثبته ده.
د کندهار دکرنې ریاست چارواکي وایي، د مرخېړیو ارزښت ته په کتو غواړي، چې په دې ولایت کې د مرخېړیو کرکیله ترویج کړي، چې له یوې خوا د کوکنارو ښه بدیل دی او له بلې خوا د بزګرانو په اقتصادي وده کې هم رغنده رول لري.
د مرخېړیو تولید او پالنه اسانه او په بازار کې یې بیه لوړ ده. کروندګر کولای شي، چې له دې لارې ښه عاید تر لاسه کړي.
د کرنې، اوبولګولو او مالدارۍ وزارت د کندهار ترڅنګ په نورو ولایتونو کې هم د مرخېړي د کرکېلي د ترویج په پار هڅې کوي؛ د کرنې، اوبولګولو او مالدارۍ وزارت له خوا د مرخېړیو د پالنې لسګونه مرکزونه جوړ شوي دي. ددغو مرکزونو د جوړلو موخه د مېرمنو او بېوزلو کورنیو اقتصادي ودې ته زمینه برابرول دي.
مرخېړي په کال کې څلور ځله حاصل ورکوي که څه هم په هېواد کې دننه د مرخېړیو د خرڅلاو ټاکلې اندازه معلومه نه ده خو په سیمه ییزو بازارونو کې د یوه کیلو ګرام مرخېړي بیه له ۲۵۰ تر ۳۰۰ افغانیو پورې رسیږي او په بهر کې بیا یو کیلو ګرام مرخیړي تر۱۴۰ ډالره پورې هم خرڅیږي.
