د ننګرهار په ۱۱ ولسوالیو کې د جوارو ننداریزې قطعې جوړیږي
۷ چنګاښ ۱۳۹۹
د ننګرهار د کرنې، اوبولګولو او مالدارۍ ریاست د کرنې وزارت د « SNaPP2» پروګرام په همکارۍ ددې ولایت د ۱۱ ولسوالیو یوشمېر مخکښو بزګرانو ته د جوارو ننداریزې قطعې جوړوی.
دننګرهار د کرنې رییس انجنیر انعام الله صافی وایي، چې ددغو ننداریزو قطعو د جوړولو په پار د ننګرهار د ۱۱ ولسوالیو پر ۴۳۰ مخکښو بزګرانو د جوارو اصلاح شوي تخمونه وېشل شوي دي.
د ننګرهار د کرنې رییس انجنیر انعام الله صافی وویل، چې د جوارو ننداریزې قطعې د کتار په ډول جوړیږي او ترڅنګ یې دکرنې وزارت د « SNaPP2» پروژې له خوا بزګرانو ته د جوارو د کرکېلي په هکله عملي او نظري زده کړې هم ورکول کیږي.
باید وویل شي، چې په عصري سیستم د جوارو کرکېله او د جوارو هایبريډ تخمونو کرل د جوارو په حاصلاتو کې د پام وړ زیاتوالی راولي.
