نورستان کې د غوزانو د عایداتي ځنګل د جوړېدو چارې پیل شوې
۲۵ وری ۱۳۹۹
د نورستان د کرنې، اوبولګولو او مالدارۍ ریاست په نوښت ددې ولایت د مرکز اړوند په پرونز کلی کې د غوزانو «چهارمغز» د عایداتي ځنګل د جوړولو چارې پیل شوي دي.
د نورستان د کرنې ریاست چارواکي وایي، چې ددې سیمې په ۱۹ جریبه ځمکه کې د غوزانو عایداتي ځنګل جوړیږي، چې په راتلونکې کې به دا لړۍ نورو سیمو ته هم وغځیږي.
چهارمغز چې د نورستان او کونړ اوسیدونکي ورته غوزان هم وایي د نورستان په ولایت کې په زیاته پیمانه تولیديږي، چې ددې ولایت د اوسیدونکو په اقتصادي ژوند کې مهم رول لري. غوزان د نورستان ولایت په ټولو سیمو کې کرل شوي دي، چې ددې ولایت له خاورې، اوبه اوهوا سره په بشپړه توګه توافق لري. د نورستان په ډېرو سیمو کې غوزان په طبیعي ډول شنه شوي دي، علایمو څخه څرګندیږي، چې غوزان ددې سیمې یو بومي بوټی دی. د چهارمغزو د ځنګلونو او تولید په هکله رسمي ارقام نشته، خو د اټکل له مخې ددې ولایت د چهارمغزو کلنۍ تولید څه باندې زر مټریک ټنو ته رسیږي.
