پکتیا کې د سیابینو په حاصلاتو کې د پام وړ زیاتوالی؛ بزګران د ښه حاصل او اقتصادي عوایدو هیله لري
۲۳ لړم ۱۴۰۵ هـ.ش
۳ جُمَادَى الثانی ۱۴۴۸ هـ.ق
د پکتیا ولایت د کرنې، اوبو لګولو او مالدارۍ ریاست وایي، چې د روان کال په ترڅ کې د دغه ولایت د مرکز ګردېز، څمکنیو او ځاځي اریوب ولسوالیو بزګرانو د سیابینو په کرنه کې د پام وړ پرمختګ کړی او په بېلابېلو سیمو کې یې د یاد محصول ښه او قناعتبښونکي حاصلات ترلاسه کړي دي.
د پکتیا د کرنې ریاست د کرنیزو فعالیتونو او حاصلاتو د ارزونې له مخې، د یادو سیمو مناسب اقلیمي شرایط، حاصلخېزې خاورې، د اوبو مناسب مدیریت او د بزګرانو هڅې هغه مهم عوامل دي، چې د سیابینو د کرکېلي او حاصلاتو په ښهوالي کې یې اغېز لرلی دی.
د سیابینو د حاصلاتو ښهوالی د سیمې د بزګرانو لپاره د اقتصادي عوایدو د زیاتوالي، د کورنیو د اړتیاوو د پوره کولو او د کرنیزو محصولاتو د ودې په برخه کې مهم پرمختګ بلل کېږي. همدارنګه، د دغه محصول زیات تولید به په سیمهییزو بازارونو کې د کرنیزو محصولاتو عرضه زیاته او د بزګرانو د اقتصادي وضعیت په پیاوړتیا کې مرسته وکړي.
سیابین یو له هغو مهمو کرنیزو محصولاتو څخه دی، چې د خوړو او مالدارۍ په برخه کې پراخ استعمال لري. د دې محصول کرکېله د بزګرانو د عوایدو د زیاتوالي ترڅنګ، د مالدارۍ لپاره د خوراکي موادو په برابرولو کې هم مهم رول لري. د کرنې وزارت د هېواد په بېلابېلو ولایتونو کې د کرنیزو محصولاتو د تولید او حاصلاتو د زیاتوالي لپاره د بزګرانو د ملاتړ او کرنیزو فعالیتونو د پراختیا هڅې کوي.
