ننګرهار کې یوشمېر بېوزله کورنیو ته د هګۍ اچوونکو چرګانو مرسته ووېشل شوه

۲۱ چنګاښ ۱۴۰۵ هـ.ش
۲۶ مُحَرَّمُ الحَرام ۱۴۴۸ه‍.ق
د ننګرهار د کرنې، اوبو لګولو او مالدارۍ ریاست په هلو ځلو، د نښځو نړۍوالې ادارې او د بشري مرستو صندوق په مالي او د مدیریت، نوښتونو او پرمختګ «امید» مؤسسې په تخنیکي همکارۍ دجلال آباد ښار اتمه ناحیه کې ١٥ بېوزله، تازه راستنو شوو او داخلي بي ځایه شوو کورنیو سره دهګیو چرګانو مرسته وشوه.
د ننګرهار د کرنې، اوبو لګولو او مالدارۍ رییس، مولوي عبدالستار محمد، د مرستو د وېش پر مهال وویل، د دې پروګرام موخه د اړمنو کورنیو د لومړنیو اړتیاوو پوره کول، اقتصادي پیاوړتیا او د دوامدارو عایداتي سرچینو رامنځته کول دي. د نوموړي په وینا، د پروژې له مخې هرې مستحقې کورنۍ ته ۳۰ قطعې هګۍ اچوونکي چرګان ورکړل شول، څو د کورنیو د خوړو خوندیتوب پیاوړی او اقتصادي وضعیت یې ښه شي.
هغه زیاته کړه، چې تر دې وړاندې هم د همدې پروژې له لارې یادو کورنیو ته د چرګانو د روزنې اړین وسایل او توکي وېشل شوي وو، چې په کې د چرګانو دانه، کړکۍ، ګاډر، د دانو او اوبو لوښي شامل وو، ترڅو د چرګانو د سالمې پالنې او روزنې لپاره مناسب شرایط برابر شي.
د چارواکو په خبره دغه ډول پروګرامونه د کلیوالو کورنیو د اقتصادي وضعیت په ښه والي، د عایداتي فرصتونو په پراختیا او د خوړو د خوندیتوب په پیاوړتیا کې مهم رول لري. 
د کرنې، اوبو لګولو او مالدارۍ وزارت د کلیوالو کورنیو د اقتصادي پیاوړتیا، د خوړو د خوندیتوب د ښه والي او د کورنیو د عایداتي سرچینو د پراختیا په موخه، د همکارو ملي او نړۍوالو مؤسسو په همکارۍ د هېواد په بېلابېلو ولایتونو کې د چرګانو روزنې او کوچنیو عایداتي پروژو د پلي کولو لړۍ روانه ساتلې، ترڅو بېوزله او اړمنې کورنۍ پر ځان بسیا او اقتصادي وضعیت یې ښه شي