نورستان کې یوشمېر کورنیو ته د بدیل معیشت په موخه محلي وزې ووېشل شوې
د نورستان ولایت د کرنې، اوبو لګولو او مالدارۍ ریاست په همغږۍ او د «انسياراو» مؤسسې په مالي ملاتړ، د یاد ولایت مرکز پارون اړوند پرونز، اشټیوي او څوڅم کلیو کې ۱۰ مستحقو، بېوزلو مېرمنو او یتیمانو ته محلي وزې ووېشل شوې.
په دې پروګرام کې ټولټال ۲۲ رأسه محلي وزې او ګډان شامل وو، چې هرې مستحقې مېرمنې ته دوه ـ دوه رأسه وزې ورکړل شوې. د مرستو د وېش بهیر د نورستان د کرنې رییس مولوي محمد ولي محسن، د مالدارۍ او حیواني روغتیا آمر ډاکټر بختیار سعید او د «انسياراو» مؤسسې د استازو په حضور کې ترسره شو.
د نورستان د کرنې ریاست مسؤلینو وویل، چې د دې مرستندویه پروګرام موخه د بېوزلو مېرمنو، کونډو او یتیمانو اقتصادي پیاوړتیا، د بدیل معیشت برابرول او د حلال عاید سرچینو ته د هغوی لاسرسی دی، څو وکولای شي د مالدارۍ له لارې د خپلو کورنیو د ژوند اړتیاوې پوره کړي.
هغوی زیاته کړه، چې دا ډول پروګرامونه نه یوازې د کلیوالو کورنیو اقتصادي وضعیت ښه کوي، بلکې د مالدارۍ سکتور د ودې، د کورنیو عوایدو د زیاتوالي او د دوامدارو کاري فرصتونو د رامنځته کېدو لامل هم ګرځي.
د کرنې، اوبو لګولو او مالدارۍ وزارت او همکارې مؤسسې په بېلابېلو ولایتونو کې د بدیل معیشت، مالدارۍ پراختیا او د کلیوالو کورنیو د اقتصادي پیاوړتیا لپاره ورته پروګرامونه پلي کوي، چې موخه یې د بېوزلۍ کمول، د عایداتي سرچینو رامنځته کول او د ټولنې د زیانمنو قشرونو ملاتړ دی.
