د اراضۍ ریاست د کارکوونکو د علمي کچې د لوړولو په موخه درې ورځنی روزنیز سیمینار پیل شو
۲۵ برګولی ۱۴۰۵ هـ.ش
۲۹ ذُوالحجّة ۱۴۴۷ هـ.ق
د مسلکي وړتیاوو د پیاوړتیا او د کارکوونکو د علمي کچې د لوړولو په موخه، د کرنې، اوبولګولو او مالدارۍ وزارت د اراضۍ ریاست کې درې ورځنی روزنیز سیمینار پیل شو.
دغه سیمینار د کرنې وزارت د کارکوونکو چارو ریاست له لوري جوړ شوی، چې په کې د اجارې ورکولو لوی رییس او د جیودیزۍ او کادستر عمومي ریاست سرپرست عبدالظاهر امین، رئیسانو، متخصصینو او د بېلابېلو څڅانګو لکه جیودیزي او ملي نښهګذاري، کارتوګرافي، کادستري سروې، فتوګرامېټري، مېټاډاټا، د ځمکو د معلوماتي سیسټم او د ځمکې بانک برخې کارکوونکو ګډون کړی دی.
د چارواکو په خبره، د دې پروګرام موخه د کارکوونکو ترمنځ د انګېزې رامنځته کول، د هغوی د تخصصي وړتیاوو لوړول او د علمي کچې پیاوړتیا ده. د هغوی په وینا، دغه سیمینار به د درې ورځو لپاره دوام ولري.
د مسؤولینو په خبره، د کارکوونکو چارو ریاست تر دې وړاندې هم د ارزونې او استملاک، د ملکیت حق د تصفیې او تثبیت، د استملاکي پروژو د انسجام، د ځمکو د لېږد او وېش، د قبالو د اجرا او ثبت، او د ښاري غیررسمي سیمو د ثبت اړوندو ریاستونو کارکوونکو ته ورته روزنیز پروګرامونه ترسره کړي دي. هغوی ټینګار کړی، چې دا روزنیز پروګرامونه به په تدریجي ډول د اراضۍ ریاست ټولې اداري برخې تر پوښښ لاندې راولي.
د دغو روزنیزو پروګرامونو ترسره کېدل د کارکوونکو د تخصصي وړتیاوو د پیاوړتیا او د هېواد د ځمکو د مدیریت او تنظیم په برخه کې د خدماتو د کیفیت د ښه والي لپاره یو مهم ګام بلل کېږي.
