د غزني ولیمحمد شهید ولسوالی کې پر لسګونو مستحقو کورنیو د شېدو وزې ووېشل شوې
۲ غبرګولی ۱۴۰۵ه.ش
۶ ذُو الحِجَّةِ ۱۴۴۷ه.ق
د غزني يولایت د ولیمحمد شهید ولسوالی د کرنې عمومي مدیریت او د مالدارۍ د ترویج مدیریت په همغږۍ او نظارت، د اړیکو دفتر مؤسسې په همکارۍ د قمبر ابریزې سیمې ۵۵ تنو مستحقو کسانو ته د شدو وزې ووېشل شوې.
د یادو وزو د وېش وړاندې، د ولسوالی د کرنې عمومي مدیریت او د مالدارۍ مدیریت مسؤلینو له لوري د څارویو فزیکي ارزونه او تخنیکي چک ترسره شو، چې په پایله کې شاوخوا ۲۶ رأس زړې او غیرمعیاري وزې مستردې او پر ځای یې د معیار مطابق څاروي د مستحقو کسانو لپاره چمتو کړل شول، څو د پروګرام موثریت او د ګټهاخیستونکو رضایت تضمین شي.
همدارنګه، د یادو مرستو له وېش سره هممهاله د کرنې عمومي مدیریت او مالدارۍ مدیریت متخصصینو مستحقو کسانو ته د څارویو د ساتنې، مناسبې روزنې، د ناروغیو د مخنیوي، تغذیې او حفظالصحې اړوند عامه پوهاوی او تخنیکي سپارښتنې وړاندې کړې.
بلخوا، د لوی اختر د رارسېدو په مناسبت، ګډونوالو ته د کانګو ناروغۍ د مخنیوي، د حیواناتو د ذبحې پر مهال د احتیاطي تدابیرو، شخصي حفظالصحې او ځانساتنې په تړاو هم عامه پوهاوی ورکړل شو، څو د دغې ناروغۍ د خپرېدو خطر راکم او د خلکو روغتیا خوندي پاتې شي
د کرنې، اوبولګولو او مالدارۍ وزارت د مالدارۍ د پیاوړتیا، د کلیوالو کورنیو د اقتصادي ملاتړ او د حیواني محصولاتو د زیاتوالي په موخه په بېلابېلو ولایتونو او ولسوالیو کې د مالدارۍ اړوند مرستندویه پروګرامونه پلي کوي، څو د بزګرانو او مالدارانو عاید لوړ او د هغوی د ژوند اقتصادي وضعیت ښه شي.
