د کندهار کرنې ریاست: د چکډېمونو رغول د اوبو مدیریت او د بزګرانو د ستونزو د حل پهپار مهم ګام دی
۲۷ غویی ۱۴۰۵ه.ش
۳۰ ذُو ٱلْقَعْدَةِ ۱۴۴۷ه.ق
د کرنې، اوبو لګولو او مالدارۍ وزارت د پراختیایي بودیجې له لارې، د کندهار د کرنې، اوبو لګولو او مالدارۍ ریاست تر رهبرۍ لاندې د کندهار ولایت د میانشین ولسوالی د میانه کلي په سیمه کې د اوبوزېرمه کولو د یوه چکډېم د بیارغونې او پارچاوې لوړولو چارې بشپړې او ګټې اخیستنې ته وسپارل شوې.
د کندهار دکرنې ریاست د چارواکو په وینا، د دغې پروژې ټولیز لګښت شاوخوا ۷۰۰ زره افغانۍ دی، چې موخه یې د اوبو د زېرمه کولو ظرفیت لوړول، د باراني اوبو مهارول او د سیمې د بزګرانو او مالدارانو د اوبو ستونزو ته رسېدنه ده.
د کندهار دکرنې ریاست د قدرتي سرچینو آمریت انجنیر نورمحمد همکار وویل، یاد چکډېم مخکې هم جوړ شوی و، خو د زیاتو اوبو د زېرمه کولو او د ظرفیت د لوړولو لپاره یې د پارچاوې لوړولو چارې په معیاري او لوړ کیفیت د شپږو اونیو په موده کې ترسره شوې دي.
د نوموړي په خبره، دغه چکډېم د شاوخوا ۱۵ زره متره مکعبه اوبو د زېرمه کولو وړتیا لري، چې د سیمې د اوبو سرچینو په پیاوړتیا او د ځمکې لاندې اوبو د سطحې په لوړولو کې به مهم رول ولوبوي.
د یادې پروژې له مهمو موخو څخه د باراني اوبو راټولول او مهارول، د سیلابونو مخنیوی، د کاریزونو او طبیعي اوبو سرچینو پیاوړي کول او د کرنیزو ځمکو لپاره د اوبو د لاسرسي ښه کول یاد شوي دي.
بلخوا، د سیمې اوسېدونکو د دغې پروژې هرکلی کړی او ویلي یې دي، چې د اوبو زېرمه کولو دا ډول پروژې د وچکالۍ د اغېزو په کمولو او د کرنې او مالدارۍ د ودې لپاره اغېزمنې دي.
د یادونې وړ ده، چې څو ورځې وړاندې هم د کندهار ولایت د ارغستان ولسوالی د ترغان په سیمه کې د اوبو زېرمه کولو د یوه ستر چکډېم د پارچاوې چارې بشپړې او ګټې اخیستنې ته سپارل شوې وې.
