د کرنې وزارت او هالند کمېټې ترمنځ د مالدارۍ نوې پروژې د پلي کېدو پهپار د همکارۍ هوکړهلیک لاسلیک شو
۱۵ غویی ۱۴۰۵ه.ش
۱۸ ذُو ٱلْقَعْدَةِ ۱۴۴۷ه.ق
د کرنې، اوبو لګولو او مالدارۍ وزارت د پلان او پالیسۍ لوی ریاست او د افغانستان لپاره د هالند کمېټې (Danish Committee for Aid to Afghan Refugees) ترمنځ د همکارۍ هوکړهلیک د کرنې وزارت په مقر کې لاسلیک شو.
د دغې هوکړهلیک له مخې، د «مالي اسانتیاوې برابرول، نوښتونو او د ناورین پر وړاندې غبرګون» تر سرلیک لاندې پروژه به د کرنې وزارت په همکارۍ د هېواد په ۱۳ ولایتونو کې پلي شي.
د یادې پروژې ټولیز ارزښت درې میلیونه، ۶۴۶ زره او ۶۳۳ امریکايي ډالره دی، چې په کابل، لوګر، ننګرهار، لغمان، هرات، بغلان، پروان، پکتیکا، میدان وردګ، خوست، پکتیا، بامیان او کونړ ولایتونو کې به پلي شي.
د کرنې وزارت د پلان او پالیسۍ لوی رییس مولوي عبدالغفور غفوري د دې پروژې له پیل څخه خوښي څرګنده کړه او د هغې پر شفاف او اغېزمن تطبیق یې ټینګار وکړ.
نوموړي د هالند کمېټې له مسؤولینو وغوښتل، څو د پروژو د پلي کېدو بهیر په منظم ډول او د مالدارانو د اړتیاوو مطابق پر مخ یوسي.
بلخوا، په افغانستان کې د هالند کمېټې رییس ډاکټر فریدون شیرالله وویل، دغه پروژه به د دوو کلونو په موده کې پلي شي او اصلي تمرکز به یې د مالدارانو پر ملاتړ وي.
د چارواکو په وینا، د دې پروژې په چوکاټ کې به د څارویو وېش، د حیواني کلینیکونو جوړول، د واکسین پلي کول، د وټرنرانو روزنه، د حیواني خوراکي توکو زېرمو جوړول، دشېدو راټولولو مرکزونو رامنځته کول او د حیواني محصولاتو د پروسس چارې په یادو ولایتونو کې ترسره شي.
