پکتیا کې یو شمېر زده کړیالانو ته د لابراټوار په برخه کې د عملي او نظري زده کړو پروګرام پیل شو
۱۰ غویی ۱۴۰۵ه.ش
۱۳ ذُو ٱلْقَعْدَةِ ۱۴۴۷ه.ق
د پکتیا پوهنتون د کرنې پوهنځی د حیواني علومو څانګې ۲۵ تنه زده کړیالان د عملي زده کړو (پرکتیک دورې) د ترسره کولو په موخه د پکتیا د کرنې، اوبولګولو او مالدارۍ ریاست ته معرفي شوي دي.
د دغو زده کړیالانو عملي او نظري زده کړې د یاد ریاست د څارویو روزنې او روغتیايي چارو آمریت له لوري په رسمي ډول پیل شوې دي.
د روزنیزې دورې په جریان کې محصلینو ته د لابراټوار په بېلابېلو برخو کې هر اړخیزې عملي او نظري زده کړې وړاندې کېږي، چې پکې د لابراټوار مدیریت، د لابراټواري وسایلو پېژندنه او کارونه، د بېلابېلو ناروغیو اړوند ازموینې (ټیسټونه)، د حیواناتو د ناروغیو تشخیص، د نمونو اخیستل او نور اړوند تخنیکي مهارتونه شامل دي.
محصلینو د یادې دورې په ترڅ کې فعاله ونډه اخیستې او توانېدلي دي، چې د لابراتوار په مهمو برخو کې اړینه علمي پوهه او عملي تجربه ترلاسه کړي.
د یادونې وړ ده، چې دغه روزنیز پروګرام د پکتیا پوهنتون او د کرنې، اوبولګولو او مالدارۍ ریاست ترمنځ د ګډې همغږۍ او همکارۍ په چوکاټ کې د اتو اوونیو لپاره دوام لري.
