د ننګرهار وادي کرنیز شرکت او د ختیځ زون تخنیکي او مسلکي زده کړو ریاست ترمنځ هوکړه لیک لاسلیک شو
۱۰ غویی ۱۴۰۵ه.ش
۱۳ ذُو ٱلْقَعْدَةِ ۱۴۴۷ه.ق
د ننګرهار وادي کرنیز امارتي شرکت او د ختیځ زون تخنیکي او مسلکي زده کړو ریاست ترمنځ د ګډو همکاریو د پلي کېدو، تخنیکي او مسلکي زده کړو د ودې، ظرفیت لوړونې او اقتصادي پرمختګ په موخه درې کلن هوکړه لیک لاسلیک شو.
دغه هوکړه لیک د دواړو ادارو ترمنځ د همغږۍ د پیاوړتیا او د ګډو پروګرامونو د عملي کولو په پار ترتیب شوی، چې له مخې به یې د تخنیکي زده کړو کیفیت لوړ او د کار بازار اړتیاوو ته ځواب ویونکی بشري ځواک وروزل شي.
د هوکړه لیک د لاسلیک په مراسمو کې د ننګرهار وادي کرنیز امارتي شرکت د سوداګرۍ او بازار موندنې رییس مولوي نعمت الله سالک، د مالي او اداري چارو رییس محمداجان راشد او د ختیځ زون تخنیکي او مسلکي زده کړو رییس پوهنیار قاضي خالد صداقت ګډون درلود.
همداراز د تعلیمي نصاب د ارزونې متخصص استاد هدایت الله ظاهر، د ریاست کارپوه مطیع الله مومند او رضوان الله امیري، د ننګرهار وادي کرنیز امارتي شرکت د مطبوعاتو او اړیکوعمومي مدیر سید همایون غریبمل او یو شمېر نورو مسؤلینو په دغو مراسمو کې حضور درلود.
مسؤلینو ټینګار وکړ چې د دې هوکړه لیک له لارې به د تخنیکي او مسلکي زده کړو په برخه کې ظرفیتونه لوړ شي او د دواړو ادارو د لا اقتصادي ودې ، تولیداتو پلور لپاره به اغېزمن ګامونه پورته شي.
