د کرنیزو او مالدارۍ محصولاتو د نندارتون له غرفو څخه د کرنې وزارت د مشرتابه لیدنه
۳ غویی ۱۴۰۵ه.ش
۶ ذُو ٱلْقَعْدَةِ ۱۴۴۷ه.ق
د بزګر مېلې او د کرنیزو او مالدارۍ محصولاتو د څلور دېرشم نندارتون په لومړۍ ورځ، د کرنې، اوبو لګولو او مالدارۍ وزیر مولوي عطاءالله عمري، د کرنې او مالدارۍ مرستیال مولوي صدراعظم عثماني او د دې وزارت مالي او اداري مرستیال مولوي نورالدین عمیر، د امارتي چارواکو او بهرنیو مېلمنو په حضور کې د یاد نندارتون له غرفو څخه لیدنه وکړه.
د دې لیدنې پر مهال، د کرنې وزارت مشرتابه د کرنیزو او مالدارۍ محصولاتو، لاسي صنایعو او نورو کورنیو تولیداتو نندارې ته د وړاندې کېدو هرکلی وکړ او د غرفهلرونکو ستونزې، وړاندیزونه او نظریات یې واورېدل.
همدارنګه د کرنې وزارت مشرتابه د نندارتون تنظیموونکو ته لارښوونه وکړه څو د غرفهلرونکو او لیدونکو لپاره لا زیاتې اسانتیاوې برابرې کړي، تر څو د کرنیزو محصولاتو د پېر او پلور او بازارموندنې لپاره پراخه زمینه برابره شي.
په دې نندارتون کې کرنیز او مالدارۍ محصولات، لاسي صنایع او نور کورني تولیدات د بزګرانو، مالدارانو، سوداګرو او متشبثینو له لوري په ۲۶۳ غرفو کې نندارې ته وړاندې شوي، چې د دغو غرفو یوه برخه د ښځو لاسي صنایعو ته ځانګړې شوې ده.
د بزګر مېله او د کرنیزو او مالدارۍ محصولاتو څلور دېرشم نندارتون د کورنیو تولیداتو د بازارموندنې په موخه، د روان کال د غويي له دویمې تر پنځمې نېټې پورې د کابل په بادامباغ کې د کرنې، اوبو لګولو او مالدارۍ وزارت له لوري په لاره اچول شوې ده.
