خوست کې له حیواني درملتونونو څخه تاریختېر درمل راټول او له منځه یوړل شول
۲۹ وری ۱۴۰۵ه.ش
۱ ذُو ٱلْقَعْدَةِ ۱۴۴۷ه.ق
د خوست ولایت کرنې، اوبو لګولو او مالدارۍ ریاست اړوند د اسماعیلخیلو او مندوزیو ولسوالی د کرنیزو چارو عمومي مدیریت د مالدارۍ برخې مسؤلینو له لوري، هغه حیواني درمل چې د منظمې څارنې او نظارت په پایله کې د ولسوالی له بېلابېلو حیواني درملتونونو څخه راټول شوي وو، د یو ګډ تخنیکي او نظارتي پلاوي په حضور کې، په یو مناسب او له معیارونو سره سم ټاکل شوي ځای کې وسوځول شول.
یاد درمل د نافذه قوانینو، اړوندو طرزالعملونو او لوایحو په رڼا کې راټول شوي وو، تر څو د بېکیفیته او تاریختېر درملو له استعمال څخه د حیواناتو د روغتیا زیانونه مخنیوی وشي، د مالدارانو اقتصادي تاوانونه راکم شي او همدارنګه د چاپېریال ساتنې او د عامه روغتیا خوندیتوب یقیني شي.
دغه راز، مسؤلینو د حیواني درملتونونو له مالکینو سره لازمې سپارښتنې هم شریکې کړې، چې له تاریختېر او بېکیفیته درملو له ساتلو او پلور څخه په کلکه ډډه وکړي او تل د معیاري او ثبت شوو درملو د عرضې په برخه کې لازم اصول مراعت کړي.
د یادونې وړ ده، چې دا ډول نظارتي او کنټرولي کړنې به په دوامداره توګه ترسره کېږي، تر څو د مالدارۍ سکتور کې شفافیت، معیاري خدمات او د خلکو باور لا پیاوړی شي.
د کرنې، اوبو لګولو او مالدارۍ وزارت تل هڅه کوي، چې د قانون پلي کول، د درملو کیفیت کنټرول، د حیواني روغتیا ساتنه او د مالدارۍ سکتور معیاري کول په اغېزمنه توګه تضمین کړي.
