کانتیوا ولسوالی ته د نورستان د کرنې رییس سفر
د نورستان ولایت د کرنې، اوبولګولو او مالدارۍ رییس مولوي محمد ولي محسن، د «ډيآرسي» مؤسسې د مسؤل عبدالمنیر رحمانزي او د پلان او همغږۍ مدیر عنایت الرحمن صافي په ملتیا کانتیوا ولسوالی ته رسمي سفر ترسره کړ.
په دې سفر کې د ځنګلونو د ساتنې، د بزګرانو د ستونزو حل، او د کرنې، ابیاري او مالدارۍ سکتور د پیاوړتیا په موخه له قومي مشرانو او سیمهییزو چارواکو سره مهمې لیدنې ترسره شوې. همدارنګه، د «ډيآرسي» مؤسسې د روانو کرنیزو پروژو څارنه هم وشوه.
د کانتیوا ولسوالی بزګرانو او مالدارانو خپلې ستونزې او ننګونې شریکې کړې، چې د کرنې رییس ورته د هر اړخیزو همکاریو ډاډ ورکړ.
نوموړي ژمنه وکړه، چې د دوی ستونزې او غوښتنې به له ولایتي ادارې، د وزارت له مشرتابه او اړوندو همکارو مؤسسو سره شریکې کړي، تر څو ورته د حل عملي لارې وموندل شي.
