سوېل ختیځ زون د ترویج کارکوونکو لپاره روزنیز پروګرام پیل شو

۱۰ سلواغه ۱۳۹۸
د کرنې، اوبولګولو او مالدارۍ وزارت د بڼوالۍ او مالدارۍ ملي پروژې «NHLP» له خوا د پکتیا، لوګر، خوست، غزني او پکتیکا ولایتونو د ترویج کارکوونکو لپاره روزنیز پروګرام پیل شوی دی.
دغه روزنیز پروګرام چې د خوست په ولایت کې په لاره اچول شوې ده، درې ورځو لپاره ده او په کې په سوېل ختيځ زون کې د بڼوالۍ او مالداۍ ملي پروژې د ترویج کارکوونکي ګډون لري.
یاد روزنيز پروګرام کې به ګډون کوونکو ته ور وښودل شي، چې څنګه کولای شي په خپلو سيمو کې د بزګر د سيمه ييز ښوونځي غونډې جوړې او بزګران وهڅوي، چې په دې غونډو کې ګډون وکړي او د کرنې او مالدارۍ په تړاو پر خپلو ستونزو له يو بل سره خبرې اترې وکړي او خپلې تجربې شريکې کړي.
سوېل ختیځ زون کې د بڼوالۍ او مالدارۍ ملي پروژې «NHLP» همغږی کوونکی عنایت الله ځلاند وايي دا ډول پروګرامونه د ترويج له مامورينو سره مرسته کوي، چې د کرنې نوې او ګټورې لارې چارې بزګرانو ته ور انتقال او په دې ډول د کرنې په پرمختګ او حاصلخيزي کې برخه واخلي.
دغه راز د خوست د کرنې، اوبولګولو او مالدارۍ رییس حفیظ الله شاه نوري دا ډول روزنیز پروګرامونه د بڼوالو او بزګرانو د وړتیا لوړولو، ښو خدمتونو وړاندې کولو او د بڼوالۍ په برخه کې د ولسونو د ستونزو هوارولو لپاره اړین وبلل.