دلغمان د کرنې ریاست او د تخنیکي او مسلکي زده کړو امریت ترمنځ د همکارۍ تړون لاسلیک شو
۲۶ کب ۱۴۰۴ه.ش
۲۸ رَمَضانُ المُبارَک ۱۴۴۷ه.ق
دلغمان د کرنې ریاست او د تخنیکي او مسلکي زده کړو امریت ترمنځ د زده کړیالانو د پرکتیک دورې په برخه کې د همکارۍ تړون لاسلیک شو.
د همکارۍ یاد تړون د لغمان د کرنې، اوبولګولو او مالدارۍ رییس مولوي سلیمان ایمن او د تخنیکي او مسلکي زده کړو آمر مفتي ذبیح الله له لوري لاسلیک شو. په دې ناسته کې د لغمان د کرنې ریاست د کرنیزو چارو آمر انجینر بریالی همدرد، مالي او اداري لوی مدیر انجینرعبیدالله ذکي او د کثیرالرشتوي انسټیټیوټ آمر قاري محمد اکرم الکوزي هم حضور درلود.
د دې هوکړهلیک له مخې به د کثیرالرشتوي انسټیټیوټ د پرکتیک دورې محصلینو ته د لغمان د کرنې، اوبولګولو او مالدارۍ ریاست د مسلکي کارکوونکو له لوري د کرنې او وترنرۍ په برخو کې عملي زده کړې ورکول کېږي، څو محصلین وکولای شي هغه زده کړې، چې په نظري ډول یې ترلاسه کړې دي، په عملي ډول هم تطبیق کړي.
د یادونې وړ ده، چې د لغمان د کرنې، اوبولګولو او مالدارۍ ریاست هر کال د یاد انسټیټیوټ تر څنګ د لغمان پوهنتون د کرنې پوهنځي له زده کړیالانو سره هم د کرنې او وترنرۍ په برخو کې د عملي زده کړو په برخه کې همکاري کوي.
