د کرنې وزیر دټاپي پروژې له رییس سره وکتل
۲۳ کب ۱۴۰۴ه.ش
۲۵ رَمَضانُ المُبارَک ۱۴۴۷ه.ق
د کرنې، اوبو لګولو او مالدارۍ وزیر مولوي عطاءالله عمري د ټاپي پروژې له رییس مراد امانوف او د ترکمنستان له سفیر خواجه عوضوف سره وکتل او په افغانستان کې د دې پروژې د مسیر د ځمکو د استملاک د بهیر په اړه یې خبرې وکړې.
په دې لیدنه کې مراد امانوف د ټاپي پروژې د پلي کېدو د بهیر په اړه معلومات وړاندې کړل او غوښتنه یې وکړه، چې د دې پروژې د مسیر د ځمکو د استملاک بهیر چټک شي او د استملاک کېدونکو ځمکو بیې دې د ټاپي پروژې د څلورو ښکېلو هېوادونو ترمنځ د لاسلیک شوي هوکړهلیک له مخې په عادلانه ډول وټاکل شي.
په همدې حال کې مولوي عطاءالله عمري د ټاپي پروژې پلي کېدل د افغانستان په ګټه وبلل او د دې پروژې مسؤلینو ته یې ډاډ ورکړ چې د هېواد د نافذه اصولو او قوانینو له مخې به د ځمکو د اجارې ټاکلې بیې مشخصې شي. د هغه په وینا، دا مهال د بیو د ټاکلو پر مسوده کار روان دی، څو د خصوصي، شخصي او امارتي ملکیتونو ځمکو لپاره عادلانه بیې وټاکل شي.
دټآپي پروژه له ترکمنستان څخه افغانستان، پاکستان او هند ته د ګازو د لېږد یوه ستره پروژه ده، چې د هغې یوه برخه مسیر له افغانستان څخه تېرېږي. د کرنې، اوبو لګولو او مالدارۍ وزارت د دې پروژې د مسیر اړوند ځمکو د ارزونې، تثبیت او استملاک په برخه کې تخنیکي ونډه لري.
