بامیان کې له کډوالۍ راستنوشویو اړمنو کورنیو ته د خوراکي غنمو او نغدي مرستو وېش لړۍ پيل شو
۲۹ سلواغه ۱۴۰۴ه.ش
۱ رَمَضانُ المُبارَک ۱۴۴۷ه.ق
د عاليقدر اميرالمؤمنين حفظه الله د لارښوونې پر بنسټ، د باميانو په ولايت کې له کډوالۍ راستنوشویو اړمنو کورنیو لپاره د بېړنيو مرستو پروګرام پيل شو. په دې پروګرام کې د خوراکي غنمو وېش او نغدي مرسته شامله ده، چې د د کرنې، اوبو لګولو او مالدارۍ وزارت د استول شوي پلاوي تر څارنې لاندې او د بامیان ولایت مقام په همغږۍ پلي شو.
د پرانيستې په مراسمو او د ياد بهير د پلي کېدو پر مهال د ولايت مرستيال، دکرنې، اوبولګولو او مالدارۍ وزارت مالي او حسابي رییس مولوی ضیاءالدین واقف، د ولايت مقام د دفتر رییس، د راستنېدونکو چارو د رياست استازو، د پېښو پر وړاندې د مبارزې رياست، د افغانۍ سرې میاشتې ټولنې استازو او همدارنګه د باميانو ولایت د کرنې، اوبو لګولو او مالدارۍ رياست چارواکو ګډون درلود.
د کرنې، اوبو لګولو او مالدارۍ وزارت د مالي او حسابي چارو رییس مولوي ضياءالدين واقف، د باميانو په ولايت کې د غنمو او نغدي مرستو د وېش د بهير د پرانيستې په مراسمو کې د عاليقدر اميرالمؤمنين حفظهالله د پېرزوینې او مهربانۍ فرمان په اړه، چې د راستنېدونکو کډوالو د ستونزو د هواري لپاره صادره شوې ده، خبرې وکړې.
نوموړي وويل، چې دغه مرستې د روژې مبارکې مياشتې د رارسېدو سره سم له کډوالۍ راستنوشویو اړمنو کورنیو ته وېشل کېږي، څو د هغوی د ستونزو يوه برخه حل او د ژوند حالت يې يو څه ښه شي.
د ځانګړې شوې ونډې له مخې، په ټوليز ډول ۳۰۰ مټريک ټنه خوراکي غنم او ۶ ميليونه افغانۍ د ۱۲۰۰ تنو اړمنو کډوالو کورنیو لپاره په پام کې نيول شوي دي. هرې مستحقې کورنۍ ته ۲۵۰ کيلوګرامه غنم او ۵۰۰۰ افغانۍ ورکړل شوې.
ياد پروګرام د اړمنو کډوالو د ملاتړ په برخه کې يو مهم او پر وخت ګام بلل کېږي او د یاد لړۍ منظم دوام، کولای شي له ټولنيز او معيشتي پلوه د پام وړ مثبت اغېز ولري.
