شمالي ولایتونو کې له کډوالۍ راستنو شويو کډوالو ته د غنمو او نغدو پیسو د وېش بهیر
۲۱ سلواغه ۱۴۰۴ه.ش
۲۲ شَعبان المُعَظّم ۱۴۴۷ه.ق
د هېواد په شمالي ولایتونو کې له کډوالۍ راستنو شويو کډوالو ته د خوراکي غنمو او نغدو پیسو د وېش بهیر په منظم، شفاف او همغږې بڼه روانه ده. دغه بهیر د اسلامي امارت د مشرتابه عاليقدر امیرالمؤمنین حفظهالله تعالی د هدایت پر بنسټ او د کرنې، اوبو لګولو او مالدارۍ وزیر مولوي عطاءالله عمري له لوري پرانیستل شوی دی.
د چارواکو د معلوماتو له مخې، یاد بهیر د بغلان، سمنګان، کندز، تخار، بدخشان، فاریاب، جوزجان، سرپل او بلخ په ولایتونو کې د کرنې، اوبو لګولو او مالدارۍ وزارت د ګومارل شوي پلاوي تر څار لاندې، د یاد وزارت د غلهجاتو د پراختیا رییس مولوي مصباحالدین مستعین په حضور او د ځایي ادارو په همکارۍ تطبیقېږي. په ځینو ولایتونو کې هرې مستحقې کورنۍ ته پنځه بوجۍ خوراکي غنم او پنځه زره افغانۍ نغدي پیسې وېشل شوې دي.
له یادو مرستو څخه له کډوالۍ راستانه شوي برخمن شويو کډوالو وېش په پروسه کې د شفافیت او نظم څخه خوښي څرګنده کړه او ویې ویل، چې دا مرسته د ژمي په موسم کې د دوی د کورنیو ځینې اساسي اړتیاوې پوره کولی شي.
د راستنو شويو کډوالو د شمېر د زیاتوالي او د ژمي په موسم کې د هغوی د معیشتي ستونزو د ډېرېدو له امله، د افغانستان اسلامي امارت مشرتابه د زیانمنو قشرونو د ملاتړ په موخه د خوراکي او نغدي مرستو د وېش پروګرام پیل کړی دی. یاد بهیر د هېواد په بېلابېلو ولایتونو کې دوام لري او موخه یې د خوراکي توکو د اړتیاوو پوره کول او د ټولنیز یووالي پیاوړتیا ده.
