خوست کې د زنجبیل سیمه ییز ورایټۍ ازمایښتي کښت چارې په بریالیتوب سره ترسره شوې
۳۰ مرغومې ۱۴۰۴ه.ش
۱ شَعبان المُعَظّم ۱۴۴۷ه.ق
د خوست ولایت کرنې، اوبو لګولو او مالدارۍ ریاست کرنیزو چارو آمریت اړوند د څېړنو لوی مدیریت له لوري، د جوارسل په څېړنیز فارم کې د زنجبیل«ادرک» د محلي ورایټۍ ازمایښتي کښت چارې په بریالیتوب سره ترسره شوې.
د یاد فعالیت اساسي موخه دا ده، چې د سیمې له اقلیمي شرایطو سره سم مناسبې، حاصلورې او د کرنې له پلوه اغېزمنې ورایټۍ وازمویل شي، څو د حاصلاتو کچه لوړه او د تولید کیفیت ښه شي.
دغه ازمایښتي کښت به د زنجبیل نبات د ودې، حاصلورکولو، د اقلیم سره د تطابق او اقتصادي ارزښت له پلوه په دوامداره ډول تر څارنې لاندې ونیول شي. د څېړنو پایلې به د راتلونکو کرنیزو پریکړو لپاره د باور وړ بنسټ برابر کړي.
د یادونې وړ ده، چې د دې څېړنې له پایلو سره سم به په راتلونکي کې بزګرانو ته د کرنې په برخه کې متنوع، باکیفیته او اقتصادي بدیلونه ور وپېژندل شي، چې دا به د کرنې پراختیا، د بزګرانو د عوایدو لوړولو او د بدیلو نقدي کښتونو د ترویج لامل وګرځي.
