د کرنې او مالدارۍ مرستیال او د هالند کمېټې د چارواکو ترمنځ لیدنه
۱ مرغومې ۱۴۰۴ه.ش
۱ رَجَب المُرَجَّب ۱۴۴۷ه.ق
د کرنې، اوبولګولو او مالدارۍ وزارت د کرنې او مالدارۍ مرستیال مولوي صدراعظم عثماني، د هالند کمېټې مرستیال ډاکتر عبدالقادر فخري، د پروګرامونو مسوول ډاکتر فریدون قیومي او د افغانستان لپاره د څارنې مسوول ډاکتر محمد شاپور بصیر سره وکتل.
په دې لیدنه کې د کرنې او مالدارۍ مرستیال د نوي کال لپاره د پروژو پر روڼتیا او اغېزمنتیا ټینګار وکړ او زیاته یې کړه، چې په تېرو کلونو کې په افغانستان کې د لوړو لګښتونو سره سره ګڼې سترې پروژې عملي شوې، خو اغېزمنې پایلې یې نه لرلې؛ له همدې امله اړینه ده، چې ټولې پروژې د خلکو لپاره په شفاف او اغېزمن ډول پلي شي.
د افغانستان لپاره د هالند کمېټې مسوولینو هم څرګنده کړه، چې یاد کمېټه دا مهال د هېواد په بېلابېلو ولایتونو کې د کرنې، مالدارۍ او قدرتي سرچینو په برخو کې بېلابېلې پروژې تر کار لاندې لري.
د کرنې، اوبولګولو او مالدارۍ وزارت مشرتابه ټینګار کوي، چې ټولې پروژې باید د خلکو او بزګرانو لپاره ګټورې وي او د مالي مرستو د ضایع کېدو مخه ونیول شي.
