د کندهار دکرنې ریاست: پاکستان څخه د کیمیاوي سرو د قاچاق مخه ونیول شوه
۲۲ لیندۍ ۱۴۰۴ هـ.ش
۲۲ جُمَادَى الثاني ۱۴۴۷ هـ.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د بوټو ژغورنې مدیریت د قرنطین چارواکو کندهار ته د کیمیاوي سرې د قاچاق مخه ونیوله، چې غوښتل یې ۱ ټن کیمیاوي توره سره په ۲۰۰ پارسلانو کې کندهار ته غیري قانوني انتقال کړي.
د قرنطین چارواکي وایي؛ یاده کیمیاوي سره هغه مهال ونیول شوه، چې قاچاق کوونکو غوښتل د برامچي د لارې له هلمند څخه کندهار ته داخل کړي. چې اړونده مسؤولینو سمدستي کیمیاوي سره ضبط و وروسته یې د کندهار ګمرک ریاست ته وسپارل.
د کندهار د کرنې ریاست د بوټو ژغورنې مدیریت ټینګار کوي، چې دوی د هر ډول قاچاقي او غیري قانوني محصولاتو د مخنیوي لپاره خپل فعالیتونه لاهم ګړندي کړي دي، او هېچا ته به اجازه ور نه کړي، چې قاچاقي توکي کندهار ته انتقال کړي.
د یادونې وړ ده، چې د افغانستان اسلامي امارت له لوري په پاکستاني وارداتو بندیز لګېدلی، او په همدې اساس د سپین بولدک، دامان او باغ پل په سیمو کې د قرنطین مسؤلینو سختې څارنې رواني دي، چې ۲ ورځي وړاندې د نږدې ۱۵۲ کریټه مالټو او لیمو قاچاقي مخه هم نیول شوې وه.
