کندهار کې د امارتي ځمکو له اجارې څخه څه باندې ۴۱۶ زره افغانۍ عواید راټول شوي

۱۱ لیندۍ ۱۴۰۴ هـ.ش
۱۱ جُمَادَى الثاني ۱۴۴۷ هـ.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د اجارې او پانګونې مدیریت مسؤلین وايي، چې د کندهار په درېیو ولسوالیو کې له ۵۳۲ جریبه امارتي ځمکو څخه ۴۱۶ زره ۷۵۰ افغانۍ عواید راټول شوي دي. چې یادې ځمکې د سوداګرۍ په موخه د آزادې داوطلبۍ له لارې په اجاره ورکړل شوي دي.
د اجارې عمومي مدیر ملا عبدالحی خالد وایي، له دې جملې څخه ۵۰۰ جریبه د ۲۵۵ زره افغانیو په ارزښت د کرنیز کمپلکس لپاره په دامان ولسوالی مانجه سیمه کې، ۳ جریبه د ۳۳ زره افغانیو په ارزښت د تیلو پمپ لپاره په کښته میوند مردک تل سیمه کې، ۱۰ جریبه د ۸ زره افغانیو په ارزښت د کارخوني لپاره په ژړۍ کیمپ سیمه کې او ۶.۵ جریبه د ۱۲۰ زره ۷۵۰ افغانیو په ارزښت د سوداګرۍ لپاره په کښته میوند نایک کاریز کې د تېرو اوو ورځو په اوږدو کې د آزادې داوطلبۍ له لارې مستحقو ګټونکو ته په اجاره ورکړل شوي دي.
ښاغلی خالد زیاتوي؛ چې اجارې ګټونکي پلان لري یادې ځمکې د سوداګرۍ لپاره وکاروي، او هر کال به د هوکړه‌لیک له مخې ټاکل شوي اجاره، پرته له نوې داوطلبۍ، د ا.ا.ا ملي بودیجې ته تحویل کړي.
د یادونې وړ ده، چې د کندهار د کرنې ریاست په دې وروستیو کې هڅې چټکې کړې دي، ترڅو د امارتي ځمکو د غصب مخه ونیسي او له شفاف، قانوني او عادلانه میکانیزم له مخې مستحقو وګړو ته په اجاره ورکړي، تر څو له دغو ځمکو مؤثره، قانوني او اقتصادي ګټه واخیستل شي.