د کندهار ارغنداب کې لسګونه جریبه ځمکه خصوصي سکټور ته په اجاره ورکړل شوه
۹ لیندۍ ۱۴۰۴ هـ.ش
۹ جُمَادَى الثاني ۱۴۴۷ هـ.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د اجارې او پانګونې مدیریت له لوري، د ارغنداب ولسوالی د سرکاري بڼ ته څېرمه ۱۰.۵ جریبه امارتي ځمکه د ازادې داوطلبۍ له لارې میلکو خصوصي کمپنۍ ته په اجاره ورکړل شوه.
د اجارې او پانګونې مدیر مولوي عبدالحی خالد وايي، چې دغه ځمکه له قانوني مراحلو وروسته داوطلبۍ ته وړاندې شوې وه، او د غوښتونکو او څارونکي پلاوي په حضور کې عادلانه داوطلبۍ ترسره شوه، چې په پایله کې میلکو کمپنۍ د یادې ځمکې مستحق ګټونکې وپېژندل شو.
نوموړی زیاتوي، چې یاده ځمکه د ازادې داوطلبۍ له لارې مستحق ګټونکي ته د یو کال لپاره په ۱ میلیون او ۱۰۲.۵ زره افغانیو په بدل کې په اجاره ورکړل شوي، او د نوموړي سره د ۳۰ کلنې اجارې هوکړه لیک شوی، چې له مخې به هر کال ټاکل شوې اندازه اجاره، د داوطلبۍ پرته، د ا.ا.ا بودیجې ته سپارل کېږي.
د یادونې وړ ده، چې دوه اوونۍ وړاندې هم د شاولیکوټ ولسوالی د موټا او سرخ سخر سیمې امارتي ځمکه د کمپلکس جوړولو لپاره د ازادې داوطلبۍ له لارې په نږدې یو میلیون افغانۍ اجاره ورکړل شوې وه.
