د افغانستان د کرنې وزیر د روسیې د کرنې له وزیر سره وکتل

٧ لیندۍ ۱۴۰۴ هـ.ش

٧ جُمَادَى الثاني ۱۴۴۷ هـ.ق
 د افغانستان اسلامي امارت د کرنې، اوبولګولو او مالدارۍ وزیر مولوي عطاالله عمري، چې د یوه لوړپوړي پلاوي په مشرۍ د روسیې هېواد مسکو ښار ته سفر کړی دی، د روسیې فدراسیون د کرنې له وزیر سره وکتل.
یاده لیدنه د دواړو هېوادونو ترمنځ د کرنې، مالدارۍ، اوبولګولو او ځمکو په برخو کې د همکاریو د پراختیا او لا زیاتې همغږۍ په موخه ترسره شوې ده.
په دې ناسته کې دواړو لورو د تخنیکي همکاریو د پراخولو، د تجربو د تبادلې او د په بېلابېلو کرنیزو برخو کې د ګډو پروژو د پلي کېدو په اړه هر اړخیزې خبرې اترې وکړې. د افغانستان د کرنې، اوبولګولو او مالدارۍ وزیر د اوبولګولو د سیستمونو د پیاوړتیا، د مالدارۍ د نسل اصلاح د پروګرامونو د پراختیا، د تخنیکي کارکوونکو د مسلکي ظرفیتونو د لوړولو او د روسیې بازارونو ته د کرنیزو محصولاتو د صادراتو د زیاتوالي پر اړتیا ټینګار وکړ.
همدارنګه، د روسیې لوري د اوبولګولو د نوو ټکنالوژیو، عصري کرنیزو سیستمونو، تخنیکي روزنو او د کرنیزو محصولاتو د وارداتو او صادراتو د اسانتیاوو په برخه کې د همکاریو وړاندیز وکړ. د روسیې فدراسیون د کرنې وزیر د افغانستان د کرنې وزارت رول د کرنې او مالدارۍ د سکتورونو په مدیریت کې مثبت وباله او ویې ویل، چې د روسیې د کرنې وزارت چمتو دی له افغانستان سره عملي او دوامدارې همکارۍ لا پیاوړې کړي.
د لیدنې په پای کې پر دې ټینګار وشو چې د دواړو هېوادونو ترمنځ کرنیزې اړیکې لا ټینګې شي، ګډ پروګرامونه پراخ شي او مسلکي همغږي دوام ومومي.
روسیه له هغو هېوادونو څخه ده، چې د کرنیزو ټکنالوژیو، عصري اوبولګولو او د خوړو د پروسس په صنعت کې پراخ ظرفیتونه لري. له بلې خوا افغانستان د حاصل‌خېزو ځمکو او باکیفیته کرنیزو محصولاتو په لرلو سره هڅه کوي، چې سیمې او نړۍ ته د خپلو محصولاتو د بازارموندنې او صادراتو لپاره سټراټیژیکې همکارۍ پیاوړې کړي.
د دواړو هېوادونو د کرنې د وزیرانو وروستۍ لیدنه د کابل او مسکو ترمنځ د دوامدارو همکاریو او د تجربو د تبادلې په لور یو مهم ګام بلل کېږي.