د کرنې او مالدارۍ مرستیال د پروان والي سره وکتل
۴ لیندۍ ۱۴۰۴ هـ.ش
۴ جُمَادَى الثانی ۱۴۴۷ هـ.ق
د کرنې وزارت د کرنې او مالدارۍ مرستیال مولوي صدراعظم عثماني، د خپل کارپه دفتر کې د پروان ولایت له والي مفتي محمد ادریس انوري سره وکتل.
په دې ناسته کې د پروان ولایت په کرنه، اوبولګولو او مالدارۍ سکتور کې د پراختیایي پروژو د تطبیق څرنګوالي، د کرنې وزارت او د سیمه ییزو مسؤلینو ترمنځ د همغږۍ د رامنځته کولو او یو شمېر نورو اړوندو موضوعاتو په اړه خبرې اترې وشوې.
د پروان والي د یاد ولایت لپاره د کرنې سکتور پر اهمیت ټینګار وکړ او د کرنې وزارت څخه یې د لا زیاتو پراختیایي پروژو د عملي کېدو غوښتنه وکړه. همدارنګه، د کرنې او مالدارۍ مرستیال وویل، چې د کرنې وزارت د کرنې د ودې او د کرنیزو تولیداتو د زیاتوالي په موخه د اغېزمنو او پراخو پروګرامونو د پلي کولو ژمن دی.
په دې لیدنه کې د سیمه ییزو وړتیاوو د پیاوړتیا او د کرنیزو پروژو په برخه کې د بزګرانو د ښکېلتیا په اړتیا هم خبرې اترې وشوې.
