کندهار کې د نږدې ۲۰۰ زره ډالرو په ارزښت ۱۵ سړې خونې ګټې اخیستنې ته وسپارل شوې
٢٩ لړم ۱۴۰۴ هـ.ش
٢٩ جُمَادَى الأول ۱۴۴۷ هـ.ق
د کندهار د کرنې، اوبولګولو او مالدارۍ ریاست په هڅو، د ملګرو ملتونو د خوړو او کرنې نړۍوال سازمان (ایفاېاو) په مالي ملاتړ او د بشري خیریه مؤسسې (او.ایچ.ډبلیو) په تخنیکي همکارۍ، د خاکریز او ژړۍ ولسوالیو د کوچني او منځني کچې بزګرانو د ملاتړ په موخه، د نږدې ۲۰۰ زره امریکایي ډالرو په ارزښت ۱۵ صفر انرژۍ لرونکي سړې خونې جوړې او رسماً ګټې اخیستنې ته وسپارل شوې.
یادې سړې خونې د بریښنا د نشتون، محلي اسانتیاوو او د سیمې اقلیمي شرایطو په نظر کې نیولو سره جوړې شوې دي. له دغو سړو خونو څخه ۱۰ د خاکریز او ۵ د ژړۍ ولسوالۍ بزګرانو ته ورکړل شوې دي، چې هره یوه یې د ۲۰ ټنه پیازو د ساتلو ظرفیت لري.
د مسؤلینو په وینا، د سړو خونو ګټه اخیستونکي هغه تولیدونکي او کرنیز ګروپونه دي، چې له وړاندې د بزګرانو د ملاتړ لپاره جوړ شوي وو، او اوس ورته د پیازو د ذخیره کولو، مدیریت او اړوندو تخنیکي چارو په برخه کې عملي او نظري روزنه ورکړل شوې ده.
د دغو سړو خونو د جوړېدو موخه دا دی چې د پیازو حاصلات د اوږدې مودې لپاره په ښه کیفیت وساتل شي، د بزګرانو تولید ته مناسبه بازارموندنه وشي، د بیو ثبات تأمین شي او د پیازو کیفیت لوړ شي. دا مرکزونه به د حاصلاتو د ضایع کېدو مخنیوی وکړي او بزګرانو ته به د مهمو فصلونو پر مهال اړینې اسانتیاوې برابرې کړي.
د یادونې وړ ده، چې د کندهار د کرنې، اوبولګولو او مالدارۍ ریاست په وروستیو کې د بزګرانو د اسانتیاوو برابرولو ته ځانګړې پاملرنه کړې او هڅه کوي، چې د ولایت په ټولو ولسوالیو کې د کرنیزو حاصلاتو د سم مدیریت، خوندي ساتنې او بازارموندنې په برخه کې لازم خدمات او عامه پوهاوی برابر کړي. متن بالا را به دری ترجمه کنید
