د اردوخان څېړنیز فارم څخه د کرنې وزارت د اطلاعاتو او عامه پوهاوی رییس لیدنه
۲۶ لړم ۱۴۰۴ هـ.ش
۲۶ جُمَادَى الأول ۱۴۴۷ هـ.ق
د اطلاعاتو او عامه پوهاوي رییس او د کرنې، اوبولګولو او مالدارۍ وزارت ویاند مولوي شیرمحمد حاتمي، د هرات ولایت د اردوخان له څېړنیز فارم څخه لیدنه وکړه. ددې لیدنې په ترڅ کې د یاد فارم د عمومي مدیر په دفتر کې ناسته ترسره شوه او د بېلابېلو برخو مسئولانو د فعالیتونو، لاستهراوړنو او د څېړنو د بهیر په تړاو مفصل راپور وړاندې کړل.
د فارم چارواکو وویل، چې په دې مرکز کې د غلېجاتو، سبو، مېوو او صنعتي نباتاتو په برخو کې څېړنیز فعالیتونه په دوامداره توګه روان دي او اساسي موخه یې د هېواد کروندګرو ته نوې، سازګاره او لوړ حاصل ورکوونکې ورایټۍ معرفي کول دي. هغوی زیاته کړه، چې د کرنیزو څېړنو د پیاوړتیا په پار د وزارت پاملرنه مهمه ده او څېړنیز فارمونه په هېواد کې کولای شي د اصلاح شوو تخمونو او بېلابېلو نباتي ډولونو د معرفۍ لپاره علمي او عملي مرکزونه و اوسي.
په دې لیدنه کې د هرات د کرنیزو چارو آمر بشیر احمد احمدي، هم حضور درلود او د دې مرکز د تجربو په اړه یې مفصل معلومات وړاندې کړل. هغه وویل، چې په دې فارم کې د انګورو، شفتالو، بادامو او نورو شاوخوا ۱۰۰ ډوله مېوو، او همدارنګه د جوارو، غنمو، لوبیا، سویا بین او مڼو د څېړنې او ارزونې تجربې ترسره شوي دي. نوموړي ټینګار وکړ چې د اقلیم سره د سازګارو او مناسبو ورایټیو معرفي کول کولای شي د حاصلاتو په زیاتوالي او د کروندګرو په اقتصادي پیاوړتیا کې مهم رول ولوبوي.
د اردوخان څېړنیز فارم چې شاوخوا ۱۰۰۰ جریبه ځمکه لري، په مسلکي لابراتوار سمبال دی او د دې توان لري، چې کرنیزې څېړنې په معیاري ډول ترسره کړي. د فارم کارکوونکو د خبرو پر مهال خپلې ستونزې او موجودې ننګونې د وزارت له پلاوي سره شریکې کړې او د تخنیکي، تجهیزاتي او تشکیلاتي اړتیاوو د حل غوښتنه یې وکړه.
مولوي شیرمحمد حاتمي د فارم د علمي او تخنیکي کدر له هڅو مننه وکړه او ټینګار یې وکړ چې د کرنې، اوبولګولو او مالدارۍ وزارت د کرنیزو څېړنو پراختیا او د څېړنیزو فارمونو پیاوړتیا د خپل کار له لومړیتوبونو څخه ګڼي. هغه زیاته کړه، چې د نوو ورایټیو معرفي او د معیاري کرکیلې د لارو چارو ترویج به د کورنیو تولیداتو په زیاتوالي او د هېواد د کرنیز سکتور په پایدار پرمختګ کې مهم رول ولوبوي.
