د افغانستان د زعفرانو نړۍوال سوداګریز مرکز څخه لیدنه
۲۶ لړم ۱۴۰۴ هـ.ش
۲۶ جُمَادَى الأول ۱۴۴۷ هـ.ق
د کرنې وزارت د اطلاعاتو او عامه پوهاوی رییس او ویاند، هرات ولایت ته د سفر پر مهال د افغانستان د زعفرانو نړۍوال سوداګریز مرکز څخه لیدنه وکړه او د دې لیدنې په ترڅ کې له ابراهیم عادل، د افغانستان د زعفرانکارانو د اتحادیې له رییس، او سید عبدالواحد سادات، د دې اتحادیې له مرستیال، سره وکتل.
په دې لیدنه کې د اتحادیې مسئولینو د زعفران د پېر او پلور حالت، کورني او بهرني بازارونو او د صادراتو بهیر په اړه معلومات وړاندې کړل او ویې ویل. چې په وروستیو کلونو کې د دې ارزښتمن محصول د تولید او بازارموندنې بهیر د پام وړ وده کړې ده. دوی زیاته کړه، چې په بېلابېلو هېوادونو کې د افغانستان زعفرانو ته غوښتنه لوړه شوې، چې دې چارې زعفرانکارانو ته نوي فرصتونه رامنځته کړي دي.
د اطلاعاتو رییس مولوي شیرمحمد حاتمي، د اتحادیې له فعالیتونو او هڅو مننه وکړه او د وزارت د رهبري پیغام یې هغوی ته ورساوه. هغه ټینګار وکړ چې د افغانستان اسلامي امارت د زعفرانو سکتور د ملاتړ او د دې محصول د سوداګرۍ د پراختیا لپاره ژمن دی او هڅه کېږي، چې د دې برخې د لا پیاوړتیا او ودې لپاره زیاتې اسانتیاوې رامنځته شي.
په دغه برنامه کې، د هرات د کرنیزو چارو آمر بشیر احمد احمدي، هم حضور درلود او د زعفرانو د پراختیا او د دې محصول د صادراتو د پیاوړتیا په برخه کې د ګډو همکاریو پر لارو چارو خبرې وشوې.
