ننګرهار کې د غنمو ننداریزو کروندو جوړولو په پار پر یوشمېر بزګرانو مرستې ووېشل شوې
۲۱ لړم ۱۴۰۴ هـ.ش
۲۱ جُمَادَى الأول ۱۴۴۷ هـ.ق
د ننګرهار ولایت دکرنې، اوبولګولو او مالدارۍ ریاست له خوا د دی ولایت په ۱۱ ولسوالیو کې پر یوشمېر بزګرانو د غنمو د ننداریزو کروندو جوړولو په پار د غنمو اصلاح شوي تخمونه او کیمیاوي سرې و ویشل شوې. یاده مرسته د کرنې، ابولګولو او مالداری وزارت د پراختیایي بودیجې له لارې ترسره شوه.
ددې مرستې موخه د بزګرانو د مهارتونو لوړول، د معیاري تخمونو استعمال، د سرې مؤثر کارونه او د حاصلاتو زیاتوالی دی.
په دې لړ کې هر بزګر ته ۲۵ کیلوګرامه دغنمو اصلاح شوي تخم، ۲۵ کیلوګرامه توره،۵۰ کیلوګرامه سپینه سره د کرنیزو عملیو ترسره کولو نغدې پیسې شامل وو.
دغه پروګرام د کرنیزو معیاري لارو چارو د ترویج، د حاصلاتو د لوړوالي او د بزګرانو د اقتصادي وضعیت د ښهوالي لپاره یو مهم ګام بلل کېږي.
همدارنگه د ننګرهار په نورو ولسوالیو کې هم د کرنې ادارې ترچتر لاندې همکارو مؤسساتو له لورې د غنمو اصلاح شوي تخمونو او کیمیاوی سرو وېش لړۍ روانه ده.
