د کرنې وزارت د پراختیایي پروګرامونو د کانسپټ نوټونو روزنیز ورکشاپ دایر شو
۲۱ لړم ۱۴۰۴ هـ.ش
۲۱ جُمَادَى الأول ۱۴۴۷ هـ.ق
د کرنې، اوبولګولو او مالدارۍ وزارت د پلان او د پروګرامونو د همغږۍ ریاست له لوري، د پراختیایي پروژو لرونکو ریاستونو مسؤلینو لپاره یو ورځنی روزنیز ورکشاپ ترسره شو.
په دغه ورکشاپ کې ګډونوالو ته د کانسپټ نوټ د ترتیب او چمتو کولو څرنګوالی، د هغې پړاوونه او د لیکلو مهم ټکي وروښودل شول. همدارنګه، د کانسپټ نوټ پر بنسټ د پروژې د تطبیق عملي لارې چارې هم ور وښودل شوې.
کانسپټ نوټ یو لنډ سند دی چې د یوې پروژې، طرحې یا د څېړنې اصلي مفکوره رانغاړي، د هغې موخې، طریقې او تمه کېدونکي پایلې تشریح کوي. دا سند د پانګهوالو، مدیرانو او همکارانو ته د پروژې د مفکورې د وړاندې کولو یوه وسیله ده، تر څو د پروژې په اړه لومړنی درک پیدا کړي او د هغې د تطبیق ملاتړ وکړي.
