پکتیکا کې ۱۲۱۰ کسانو ته د کار په بدل کې نغدې پیسې ووېشل شوې
۱۹ لړم ۱۴۰۴ هـ.ش
۱۹ جُمَادَى الأول ۱۴۴۷ هـ.ق
د پکتیکا ولایت د کرنې، اوبولګولو او مالدارۍ ریاست د معلوماتو له مخې، د دغه ولایت د ګومل او جانیخیل ولسوالیو په سیمو کې د خوړو نړۍوال پروګرام «ډبلیو.اف.پي» په مالي ملاتړ او د «هیلټو» موسسې په تخنیکي همکارۍ، ۱۲۱۰ تنو مستقیمو ګټه اخیستونکو ته د بېلابېلو پرمختیایي پروژو له لارې د کار په بدل کې د دوو میاشتو معاشونه ورکړل شول.
یادې پروژې د اوبولګولو کانالونو، د اوبو حوضونو، ترینچونو، د سړکونو ترمیم، د ګبیون دېوالونو جوړول، د مالدارۍ برخه او د خوړو د پروسس پروژې رانغاړي، چې له امله یې سلګونو کسانو ته د کار مناسب فرصتونه برابر شوي دي.
د پکتیکا د کرنې ریاست د چارواکو په وینا، هر یو ګټه اخیستونکي ته د کار په بدل کې د میاشتې شپږ زره او ۴۰۰ افغانۍ ورکړل شوې، چې د دوو میاشتو لپاره یې ټولیزه اندازه ۱۲ زره او ۸۰۰ افغانۍ کېږي.
په ټوله کې، د دواړو ولسوالیو په سطحه نږدې ۱۶ میلیونه افغانۍ د کارګرو ترمنځ وېشل شوې دي.
دغه پروګرام د کرنې وزارت، نړۍوالو مرستندویو مؤسسو او سیمهییزو ادارو ترمنځ د همغږۍ یوه بریالۍ بېلګه بلل کېږي، چې موخه یې د خلکو د اقتصادي وضعیت ښهوالی او د کرنیزو خدمتونو پیاوړتیا ده.
