د خوست موسی خېل ولسوالی کې پر ۴۸ بزګرانو د غنمو اصلاح شوي تخمونه او کیمیاوي سرې وویشل شوې
د خوست ولایت د موسی خېلو ولسوالی ۴۸ مستحقو بزګرانو ته د غنمو اصلاح شوي تخمونه او کیمیاوي سرې د کرنې، اوبولګولو او مالدارۍ ریاست په همغږۍ او د نړۍوالو بنسټونو په ملاتړ وویشل شوې.
د خوست ولایت د کرنې، اوبولګولو او مالدارۍ ریاست تر چتر لاندې، د موسی خېلو ولسوالی د کرنیزو چارو عمومي مدیریت په څارنه، د «اې.ډي.اې» مؤسسې په همکارۍ او او د خوړو نړۍوال پروګرام «ډبلیو.اف.پي» په مالي ملاتړ، ۴۸ مستحقو بزګرانو ته د غنمو اصلاح شوي تخمونه او کیمیاوي سرې ووېشل شوې.
په دې ویش غونډه کې د خوست د کرنې، اوبولګولو او مالدارۍ ریاست استازي هم ګډون درلود. د یاد ریاست استازي د بزګرانو د هڅونې ترڅنګ وویل، چې د کرنې ریاست هڅه کوي د معیاري تخمونو او سرو د وېش له لارې د کرنیزو حاصلاتو کچه لوړه او د ځانبسیا کرنې بنسټ لا پیاوړی کړي.
دغه پروګرام د موسی خېلو ولسوالی د بزګرانو د اقتصادي پیاوړتیا، د غنمو د تولید د زیاتوالي او د خوړو د خوندیتوب د ټینګښت په موخه عملي شوی دی.
