دلغمان د کرنې ریاست کارکوونکو د ریاست په انګړ او سراج بڼ کې د پاککارۍ حشر ترسره کړ
۲۴ تله ۱۴۰۴ هـ.ش
۲۳ رَبِیعُ الْثاني ۱۴۴۷ هـ.ق
د لغمان د کرنې، اوبولګولو او مالدارۍ ریاست کارکوونکو د چاپېریال د پاک ساتلو په موخه د پاککارۍ حشر ترسره کړ.
یاد حشر د لغمان د کرنې رییس مولوي عبدالستار محمد په لارښوونه ترسره شو، چې پکې د ریاست ټولو کارکوونکو فعاله ونډه لرله. د حشر موخه د ریاست د انګړ او د سراج بڼ د پاکولو او ښایسته کولو چارې وې.
د حشر پر مهال د ریاست کارکوونکو د پلاستیکونو او نباتي پاتې شونو ټولونه، د سراج بڼ د ویالو او سړکونو صفایي او د کثافاتو انتقال ترسره کړل، څو یو پاک، منظم او ښکلې فضا رامنځته شي.
د لغمان د کرنې ریاست مسؤلینو وویل: «پاکي د ایمان برخه ده، او هر مسلمان باید د خپل دیني او ټولنیز مسؤلیت له مخې چاپېریال پاک وساتي، څو زموږ ښارونه، ادارې او عامه ځایونه پاک او منظم پاتې شي».
دغه ډول حشرونه د کارکوونکو د یووالي، نظم او همکارۍ څرګندونه کوي او د نورو ادارو لپاره به د یوې ښې بېلګې په توګه دوام ومومي.
د لغمان د کرنې ریاست له مهترلام ښاریانو غوښتنه وکړه، چې د سراج بڼ د تفریح پر مهال دې د کثافاتو د بېځایه غورځولو څخه ډډه وکړي او د پاک چاپېریال په ساتنه کې دې فعاله ونډه واخلي.
