پنجشېر کې د لوبیا حاصلات زیات شوي
۱۴ تله ۱۴۰۴ هـ.ش
۱۳ رَبِیعُ الْثاني ۱۴۴۷ هـ.ق
د پنجشېر د کرنې، اوبو لګولو او مالدارۍ ریاست اعلان کړی، چې په روان کال کې د دې ولایت د لوبیا حاصلات د تېر کال په پرتله پنځه سلنه زیات شوي دي.
د یاد ریاست د شمېرو له مخې، سږکال د پنجشېر د ولایت په کچه ۱۶۹۸ متریک ټنه لوبیا راټوله شوې، په داسې حال کې چې دا شمېر په تېر کال کې ۱۶۰۹ متریک ټنه وو.
د پنجشېر د کرنې رییس قاري فضلالله دیوبندي وایي، چې سږکال په دې ولایت کې ۱۳۴۳ هکټاره ځمکه د لوبیا تر کښت لاندې وه، او د تولید زیاتوالی د کرنیزو سیمو د پراخېدو او له بزګرانو سره د دې ریاست د نږدې همکارۍ پایله ده.
د پنجشېر بزګران د کرنې ریاست له ملاتړیزو پروګرامونو خوښي څرګندوي او د دغو مرستو د دوام غوښتنه کوي.
