کندز کې د وریجو حاصلات څه باندې ۱۷۷ زره مټریک ټنو ته و رسېد
د کندز ولایت د کرنې، اوبو لګولو او مالدارۍ ریاست چارواي وايي، سږ کال په دې ولایت کې له ۱۷۷ زره متریک ټنو څخه زیات ورجې تولید شوي دي.
د یاد ریاست د شمېرنو له مخې، روان کال په کندز کې پر ۴۸ زره او ۷۲۷ هکټاره ځمکه شولې کرل شوې وه، چې له دغو کروندو څخه ۱۷۷ زره او ۳۶۷ مټریک ټنه حاصلات تر لاسه شوي دي.
دا په داسې حال کې ده، چې د کرنې وزارت د کرنیزو معلوماتو او احصایې ریاست د شمېرنو له مخې کندز کې تېر کال په ۴۰ زره او ۶۶۱ هکټاره ځمکه کې شولې کرل شوی و، چې ۱۲۹ زره او ۷۴۸ مټریک ټنه وریجې ترې ټولې شوې وې، چې دغه شمېرې د شولې په حاصلاتو کې د پام وړ زیاتوالی ښيي.
د کندز د کرنې ریاست چاراکوی وایي، د اصلاح شویو تخمونو او کیمیاوي سرو کارول، د کتاري کرنې دودول، د آفتونو او ناروغیو کنترول او د کرکیلې سیمې پراخول هغه لاملونه دي، چې په دې ولایت کې د شولې د حاصلاتو د زیاتوالي لامل شوي دي.
شولې تر غنمو وروسته په کندز کې دوهم مهم کرنیز محصول ګڼل کېږي، چې تر ډېره ددې ولایت په مرکز او دغه راز د خاناباد، امام صاحب، چهاردرې او علياباد ولسوالیو کې کرل او پروسس کېږي.
د کندز کروندګر وايي، د نورو کرنیزو محصولاتو په پرتله د شولې کر او راټولونه ډېرې هڅې ته اړتیا لري، خو عاید یې له زحمتونو سره برابر نه دی.
په کندز کې ډول ډول شولې کرل کېږي، لکه سرخه زراعتي، باسمتي، مونده، شالونګي، ایراني، سردهباره او ګرمهباره. له یادو ډولونو څخه د «سردهباره» وریجې د خپل ځانګړي خوند او شهرت له امله ځانګړی مقام لري.
