د بلخ نهرشاهي کې بزګرانو ته د زعفرانو د کرکیلې او حاصل ټولولو روزنه ورکړل شوه

۲۲ وږی ۱۴۰۴ هـ.ش
۲۰ رَبِیعُ الْأَوَّل ۱۴۴۷ هـ.ق
د بلخ دکرنې، اوبولګولو او مالدارۍ ریاست د لاس په لاس موسسې په همکاري د دې ولایت د نهرشاهي ولسوالی په شهرک ترکمنیه، اوته قل او سیاه‌ګرد سیمو کې ۵۰ تنو بزګرانو دکتار په بڼه د زعفرانو کرکیلې او حاصل ټولولو په برخه کې عملي زده کړې ورکړې.
یاد روزنیز پروګرام د دې لپاره ترسره شو، څو بزګران وکولای شي د زعفرانو په معیاري ډول کر او پالنه وکړي او په راتلونکي کې له دې برخې څخه ښه او لوړ حاصلات تر لاسه کړي.
چارواکي وایي، د دغو پروګرامونو دوام به د زعفرانو کرنه نوره هم معیاري کړي او د بزګرانو د عوایدو په لوړولو کې به مهم رول ولوبوي.
زعفران د افغانستان له مهمو کرنیزو محصولاتو څخه شمېرل کېږي، چې د هېواد په بېلابېلو ولایتونو کې کرل کېږي. د کرنې وزارت او مرستندویه موسسې هڅه کوي، چې د معیاري زده کړو او عملي پروګرامونو له لارې بزګران وهڅوي څو د زعفرانو د کر او پالنې په برخه کې نوې لارې چارې وکاروي.