آقتاش ولسوالی ته د کندز دکرنې رییس سفر

۲۰ وږی ۱۴۰۴ هـ.ش
۱۸ رَبِیعُ الْأَوَّل ۱۴۴۷ هـ.ق
د کندز ولایت د کرنې، اوبو لګولو او مالدارۍ رییس مولوي نیاز محمد عابد د یوې کاري پلاوي په مشرۍ آقتاش ولسوالی ته سفر وکړ. د یاد سفر موخه د کرنې او مالدارۍ وضعیت ارزونه او له سیمه‌ییزو مسئولینو سره د لا زیاتې همغږۍ رامنځته کول وو.
د دې سفر پر مهال دکندز دکرنې رییس د اقتاش ولسوالی د ولسوال مرستیال او ګڼ شمېر بزګرانو او مالدارانو سره وکتل او د هغوی ستونزې او غوښتنې له نږدې واورېدل. همدارنګه د کرنې او مالدارۍ د برخې د پیاوړتیا، د بزګرانو سره د لا ډېرو همکاریو او پرمختیایي پروګرامونو په اړه هر اړخیزې خبرې وشوې.
 د کرنې ریس له خپل کاري پلاوي سره یو ځای د آقتاش ولسوالی د کرنیزو خدمتونو له مدیریت څخه هم لیدنه وکړه او پر دې یې ټینګار وکړ چې بزګرانو او مالدارانو ته باید لا اغېزمن خدمتونه وړاندې شي.
نوموړي په دې ولسوالۍ کې د کرنیزو خدمتونو د لا ښه والي، د بزګرانو د ستونزو د حل او د کرنیزو او مالدارۍ تولیداتو د کچې د لوړولو لپاره د لا ډېرو هڅو ټینګار وکړ.