نورستان کې پر ۲۰۵۰ بزګرانو د غنمو اصلاح شوي تخمونه او سرې ووېشل شوې
۲۶ لېندۍ ۱۳۹۸
د نورستان دکرنې، اوبولګولو او مالدارۍ ریاست چارواکي وایي، چې ددې ولایت د واینت وایګل ولسوالۍ پر ۲۰۵۰ بزګرانو د غنمو اصلاح شوي تخمونه او کیمیاوي سرې وېشلي دي. ددغو مرستو موخه د بزګرانو ملاتړ او په دې ولایت کې د غنمو د حاصلاتو لوړوالی دی.
د نورستان دکرنې ریاست چارواکي وایي، دغه مرستې چې د ملګرو ملتونو د خوړو او کرنې ادارې «FAO» په همکارۍ چمتو شوې وه، پر دغو ۲۰۵۰ بزګرانو پر هر یوه بزګر د غنمو ۵۰ کیلوګرامه اصلاح شوي تخمونه، ۵۰ کیلو ګرامه توره سره (DAP) او ۵۰ کيلو ګرامه سپينه سره (يوريا) وېشل شوي دي. د چارواکو په خبره د غنمو یاد اصلاح شوي تخمونه او کیمیاوي سرې په وړیا توګه پر دغو بزګرانو وېشل شوي دي.
له دغو مرستو څخه برخمن شوي کروند ګرو د مرستې په ترلاسه کولو خوښي وښودل او ډاډ يې ورکړل، چي په خپلو مځکو کي به يې کري.
د نورستان د کرنې ریاست وایي ددې مرستې لړۍ به دوام ولري او په راتلونکي کې به پرنورو بزګرانو هم ورته توکي ووېشل شي.
