لغمان کې د باران او واورې د اورښت معلومولو لپاره د ولسوالیو کارکوونکو ته د بارانسنج آلې ووېشل شوې
د لغمان د کرنې، اوبولګولو او مالدارۍ ریاست له خوا د دې ولایت د پنځو ولسوالیو د کرنیزو چارو مسؤلینو ته د بارانسنج آلې ووېشل شوې او په دې برخه کې مسلکي روزنه ورکړل شوه. یاد روزنیز پروګرام د کرنې وزارت په لارښوونه او د لغمان د کرنې ریاست د احصایې او اداري معلوماتو سیستم مدیرله لوري وړاندې شو.
په روزنه کې د باران او واورې د اورښت اندازهګیري، د کوبو د استعمال، او د اوفن کامرې د کارولو څرنګوالی په عملي توګه وښودل شو.
د پروګرام په پای کې د لغمان د کرنې رییس، مولوي عبدالستار محمد، ګډون وکړ. نوموړي په دې اقدام خوښي څرګنده کړه او مسؤل کارکوونکي یې وهڅول، چې د باران او واورې د اورښت دقیقې اندازې په وخت د آنلاین سیستم له لارې د کرنې وزارت سره شریکې کړي. هغه ټینګار وکړ چې په دې برخه کې باید اړوند کارونه په جدي توګه ترسره شي.
د یادونې وړ ده، چې له دې وروسته به د باران او واورې د اورښت اندازه د هرې ولسوالۍ او ټول ولایت په کچه په دقیقه توګه ثبت او معلومه شي.
