ننګرهار کې سلګونو مېرمنو ته د شېدو غواګانې ووېشل شوې
۲۱ چنګاښ ۱۴۰۴ ه.ش
۱۶ مُحَرَّمُ الحَرام ۱۴۴۷ه.ق
د ننګرهار د کرنې، اوبو لګولو او مالدارۍ ریاست په هڅو او د نه انلوس مؤسسې له لورې د ننګرهار په څلورو ولسوالیو کې سلګونو کونډو او بې وزله مېرمنو ته د شېدو غواګانې ورکړل شوې.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې د نه انلوس مؤسسې له لورې په دره نور، بهسود، کامه او سره رود ولسوالیو کې ۱۷۸ مېرمنو ته د شېدو غواګانې د کورني اقتصاد پیاوړتیا، لبنې محصولاتو زیاتوالي او مالدارۍ سکتور دپیاوړتیا په موخه ووېشل شوې.
ښاغلي محسن وویل، چې په راتلوونکي کې یادو مېرمنو ته د څارویو تغذیي او پیاوړتیا لپاره حیواني خوراکه او روزنې هم ورکول کېږي.
د دره نور ولسوالۍ مرستیال مولوی بصیراحمد سهیل وویل، چې دره نور ولسوالۍ د مالدارۍ لپاره مساعدې سیمې لري او په دې برخه کې دننګرهار د کرنې ریاست څخه دلا زیاتو همکاریو غوښتنه وکړه.
همدارنګه د څارویو روغتیا او مالدارۍ امر داکتر محمد ضمیر بهسودي او د نه انلوس مؤسسي کارکوونکي ډاکتر اسلام الدین عمادي د مالدارۍ پر ارزښت، ساتنې او حیواني خوراکې تفصیلی معلومات مالدارانو ته وړاندې کړل.
د ننګرهار د کرنې ریاست هڅه کوي په کلیوالي سیمو کې د خلکو اقتصادی پیاوړتیا په موخه ګتورې پروژې پلي کړي.
