د ننګرهار وادي کرنیز شرکت د محافظوي پولې رغنیزې چارې بشپړې شوې
۱۸ چنګاښ ۱۴۰۴ ه.ش
۱۳ مُحَرَّمُ الحَرام ۱۴۴۷ه.ق
د ننګرهار وادي کرنیز شرکت چارواکي وایي، چې د ورستیو اورښتونو، سېلابونو او زیاتو اوبو راوتو له امله د ننګرهار وادي کرنيز ا شرکت د «۲۳ ويالې سوېل» په سیمه کې شاوخوا ۷۰ متره محافظوي پوله بشپړه له منځه تللې وه، چې د زرګونه جریبه کرنیزو ځمکو د تخریب جدي اندېښنه یې راپارولې وه.
د چارواکو په خبره د یاد شرکت د امکاناتو، ماشینرۍ او فني ټیم په مټ د دغې پولې د بیا تړلو او ترمیم چارې نن بشپړې شوې، چې په پایله کې یې سلګونه جریبه کرنیزې ځمکې او کورونه د اوبو له ستر ګواښ څخه وژغورل شول.
تېره ورځ د ننګرهار وادي کرنيز شرکت اجرائيوي رییس سېد محمد نعيم «محمدي» د اوبو لګولو د تخنيکي ساتنې او څارنې امر، درېيم فارم امر، د املاکو سرپرست امر، لوړپوړو مدیرانو او فني کارکوونکو په ملتیا د ترميمي چارو له سیمې ليدنه وکړه.
د ننګرهار وادي کرنيز شرکت ژمن دی، چې د خپلو کرنيزو ځمکو، دولتي شتمنيو او همکارو شرکتونو او خلکو د ملکيتونو د خوندي ساتلو لپاره خپلې هلې ځلې لا پیاوړې او چټکې کړي.
