د کندهار شاولیکوټ ولسوالی کې د اصلاح شویو تخمونو معیاري زېرمه تون رغنیزې چارې پیل شوې
۷ چنګاښ ۱۴۰۴ ه.ش
۱ مُحَرَّمُ الحَرام ۱۴۴۷ه.ق
د کندهار کرنې، اوبو لګولو او مالدارۍ ریاست په نوښت، له جرمونو او مخدره توکو سره د ملګرو ملتونو د مبارزې دفتر (یو.ان.او.ډې.سي) په مالي او د افغانستان لپاره د هالنډ کمیټې په تخنیکي همکارۍ، د کندهار د شاولیکوټ ولسوالی د سربند په سیمه کې د نږدې درې زره امریکایې ډالرو په لګښت د اصلاح شویو تخمونو زېرمه کولو لپاره د معیاري زېرمه تون رغیزې چارې پیل شوې.
دغه زېرمه تون چې ۸.۵ متره اوږدوالی، ۴ متره پراخوالي او ۳ متره جګوالی لري او د معیاري درې لاټه تخم اېښودو په صورت کې د ۲۵ متریک ټنه پاک تخمونو د زېرمه کولو ظرفیت لري، چې رغنیزې چارې به یې د شپږو اوونیو په ترڅ کې بشپړ او ګټې اخیستنې ته به وسپارل شي. دا تخمونه د ۱۰۰۰ جریبه ځمکې د کرلو لپاره بسنه کوي، که چیري هر بزګر ته ۵۰ کیلو تخم ورکړل سي، ۵۰۰ بزګران به ترې ګټه واخلي. همدارنګه د تخم پاکولو لپاره یو ځانګړی خونه جوړه شوې، چې د ۱۰–۱۲ متریک ټنه ناپاکو تخمونو دزېرمه کولو ظرفیت لري.
دغه زېرمه تون ته د پاک کارۍ یو ماشین هم ورکړل شوي، چې په ۹۰ دقیقو کې یو ټن تخم پاکوي. سربېره پر دې، ۲۰ پلیټونه، تش پارسلونه، د پارسل ګنډلو ماشین، د پارسل ډکولو ۲ بمبوګان، ترازو او نور اړین وسایل هم ورته برابر شوي دي.
ددغې زېرمه تون د جوړېدو موخه د کوکنارو بدیل په توګه د اصلاح شویو تخمونو پراختیا، د بزګرانو لپاره اړینې چوپړتیاوې برابرول او د هغوي لپاره اسانتیاوې رامنځته کول دي، ترڅو بزګران دغه زېرمه تون څخه مؤثره استفاده وکړي.
