کندهار ولایت کې د څارویو د طبق، کانګو او چنجیو ضد درې ګونه وقایوي کمپاین پیل شو

د کندهار د کرنې، اوبو لګولو او مالدارۍ ریاست د اروپایي ټولنې په مالي ملاتړ او د هالنډ کمېټې په تخنیکي همکارۍ د څارویو درې مهم وقایوي کمپاینونه د کندهار ولایت په لسو ولسوالیو کې پیل کړل. دغه کمپاینونه د طبق وژونکې ناروغۍ درملنه، د کانګو ناروغۍ وقایوي درمل‌شیندنه او د چنجیو ضد درملو تطبیق په برخه کې ترسره کېږي.
یاد وقایوي اقدامات به د کندهار په ډنډ، دامان، پنجوايي، لوړ میوند، کښته میوند، ارغنداب، خاکریز، نېش، غورک، او سپین بولدک ولسوالیو کې د مسلکي پاراوټرانو له خوا تطبیق شي.
ددې کمپاین په ترڅ کې به شاوخوا ۶۵ زره او ۷۰۰ څاروي د کانګو ناروغۍ پر ضد واکسین او درمل شیندنه شي؛ لسګونه زره هغه  څاروي، چې د طبق ناروغۍ لري درملنه کېږي او ۳۲ زره او ۹۰۰ څارویو ته به د چنجیو ضد درمل ورکړل شي.
د کندهار د کرنې، اوبو لګولو او مالدارۍ ریاست مسؤلینو څرګنده کړه، چې د دغو کمپاینونو موخه د مالدارۍ سکتور ته جدي پاملرنه، د وژونکو ناروغیو وقایه، د څارویو د روغتیا خوندیتوب، او په لرې پرتو سیمو کې د مالدارانو لپاره د حیواني خدماتو پراخول دي.
دوی زیاته کړه، چې دا ډول وقایوي اقدامات نه یوازې د ناروغیو د خپرېدو مخنیوی کوي، بلکې د مالدارانو اقتصادي ثبات ته هم زمینه برابروي.
د یادونې وړ ده، چې د مالدارۍ د پیاوړتیا په برخه کې دا لومړۍ هڅه نه ده، بلکې د تېرو څلورو میاشتو په جریان کې هم د کرنې وزارت او د ملګرو ملتونو دخوړو او کرنې ادارې «اف،اې،او» په همکارۍ د کانګو او طبق ناروغیو پر ضد وقایوي واکسینونه او درمل شیندنه ترسره شوې دي.
د کندهار د کرنې ریاست تمه لري، چې د یادو کمپاینونو له لارې به د څارویو د ناروغیو کچه د پام وړ کمه شي او د مالدارانو عواید به ډېر شي.