ننګرهار کې  پر ۱۰۰  جریبه ځمکه د بېرې ځنګل جوړېږي

۲ چنګاښ ۱۴۰۴ ه‍.ش
۲۶ ذُو الحِجَّةِ ۱۴۴۶ه‍.ق
د ننګرهارد کرنې، اوبو لګولو او مالدارۍ ریاست سره په همغږۍ د ملګرو ملتونو پراختیایي پروګرام «یو،ان،ډي،پي» له لورې په ننګرهار کې د شاتو مچیو روزنکو ستونزو حل په موخه پر سل جریبه ځمکه د بېرې ځنګل جوړوي.
د ملګرو ملتونو پراختیایي پروګرام «یو،ان،ډي،پي» استازو د ننګرهار د کرنې رییس مولوی محمد ولي محسن سره په ناسته کې د بېرې ځنګل لپاره د مناسبو ځایونو انتخاب او غوره نوعو کرلو کې د همکارۍ غوښتنه وکړه.
همدارنګه «یو،ان،ډي،پي» په خوږیاڼو او هسکي مېني ولسوالیو کې د بي موسمه سبو او مېوو تولید په پار د  ۱۲ بابه شنوخونو جوړولو پلان هم لري، چې په لنډ وخت کې به پر شرایطو برابر او علاقمندو بزګرانو انتخاب او د شنوخونو جوړولو چارې پیل شي.
دغه راز دوی په ځینو نورو برخو کې دمؤثره پروژو ډیزاین همکارۍ غوښتنه هم وکړه.
د ننګرهار د کرنې، اوبو لګولو او مالدارۍ رییس مولوي محمد ولي محسن د بېرې ځنګلونو او شنوخونو جوړول د بزګرانو او شاتو مچیو روزنکو لپاره یو ښه اقدام وباله او د کرنې ادارې له لورې د پوره همغږۍ او همکارۍ ډاډ ورکړ.
د ننګرهار د کرنې رییس په غریزو سیمو کې د چهارمغزو، بادام، جلغوزیو او ګورګرو د کرلو ترڅنګ د کوزکونړ ولسوالی د بېرې ځنګل د پالنې او ساتنې غوښتنه هم وکړه.
د سرچینې د مالوماتو له مخې د دې ځنګل په جوړېدو سره به سلګونوکسانو ته د کار زمینه برابره شي او دغه رازکرنېزې ځمکې به د سېلابونو له خطر څخه وساتل شي او د دې ترڅنګ د شاتو مچیو کاروباریانو ته به د شاتو د تولید ښه زمینه برابره شي. د یادونې وړ ده، چې تر دې وړاندې هم ورته ځنګلونه جوړ شوي دي.