د هلمند مرکز لښکرګاه کې د کانګو تبې پر وړاندې د مبارزې وقایوي کمپاین پیل شو

۲ چنګاښ ۱۴۰۴ ه‍.ش
۲۶ ذُو الحِجَّةِ ۱۴۴۶ه‍.ق
د هلمند د کرنې، اوبو لګولو او مالدارۍ ریاست اړوند د مالدارۍ او حیواني روغتیا آمریت له لوري، ددې ولایت مرکز لښکرګاه کې د کانګو تبې خطرناکې ناروغۍ د مخنیوي په موخه وقایوي کمپاین پیل شوی دی.
د کانګو تبه یوه وژونکې ساري ناروغي ده چې د څارویو له لارې انسانانو ته انتقالېږي. دا ناروغي نه یوازې د انسان ژوند ته جدي ګواښ دی، بلکې د مالدارۍ سکتور ته هم درانه اقتصادي زیانونه رسوي. د همدې ګواښ د مخنیوي لپاره، یاد آمریت وقایوي درمل هغو حیواني کلینیکونو ته سپارلي دي چې له دې آمریت سره یې دوامداره همکاري لري.
یاد درمل به د هرې سیمې په ساحو کې د مالدارانو د څارویو طویلو، استوګنځایونو، ګنجونو او نورو اړوندو ځایونو کې شیندل کېږي، ترڅو د کانګو بتې لیږدونکي کڼې له منځه یوسې.
همداراز، د کمپاین په ترڅ کې مالدارانو ته د کانګو تبې ناروغۍ په اړه عامه پوهاوی ورکول کېږي، ترڅو دوی د خپلو څارویو او کورنیو د خوندیتوب لپاره لازم وقایوي تدابیر ونیسي.
د کرنې ریاست مسؤلین وایي، چې دا ډول وقایوي کمپاینونه به دوام ومومي، څو د څارویو روغتیا خوندي او د مالدارانو اقتصادي زیانونه محدود شي.