د خوست ځاځي میدان ولسوالۍ کې د  چارمغزو ۴۰زره او ۵۰۰ نیالګیو کېنولو پروژې څخه نظارت ترسره شو

د خوست ولایت د کرنې ریاست له لوري د افرین مؤسسې د واټرشیډ چارمغزو نیالګیو د کېنولو پروژې څخه نظارت ترسره شو. د کرنیزو چارو عمومي مدیر واحد نور دغه پروژه مثبته وارزوله او د مؤسسې له کارونو څخه یې خوښي وښوده.
یاده پروژه کې د ۴۰زره او ۵۰۰ چارمغزو نیالګیو کېنول شامل دي، چې له ډلې یې ډېری نیالګي شنه شوي او ښه وده یې کړې ده. د لیدنې پر مهال د افرین مؤسسې مسؤلینو ځایي خلکو ته د ځنګلونو د ساتنې، د پروژې پوښښ سیمو ته د حیواناتو د نه پرېښودو او د چاپېریال ساتنې پر ارزښت معلومات وړاندې کړل.
د کرنیزو چارو عمومي مدير د افرین مؤسسې فعالیتونه مثبت وارزول او د دایمي او دوامداره پروژو د پلي کېدو هیله یې څرګنده کړه، ترڅنګ یې د خپل ریاست له لوري د همکارۍ ډاډ هم ورکړ.
د افرین مؤسسه په خوست ولایت کې د طبیعي سرچینو د احیا، ځنګلونو د پراختیا او کرنیزو ساحو د ښه والي لپاره بېلابېلې پروژې تطبیقوي. د چارمغزو نیالګیو کېنول نه یوازې اقتصادي ارزښت لري، بلکې د چاپېریال د ساتنې او د ځنګلي سیمو د احیا په برخه کې هم مهم رول لوبوي.